Kapper-'Aershop

"Waer kom je vandaen jôi?"
"Van de kapper."
"Wat 'ebbe ze met je-ût'e'aeld?
As je 'n vêlig'êdspeld in je-oor doet, ben je precies 'n punk."
"Kom Im, overdrêf iet zô."
" 'Êlemael iet, kik mar in de spiegel, al je 'aer staet rechtop. Wat 'ebbe ze d'r in 'edaen?"
" Gel..."
"Voor mên is 't geweun stêfsel. Ben je komme lôpe?"
"Neen , ik was met te-auto."
" O, gelukkig 't is gien gezicht."
"Je praet me wel moed in, Im."
" 'T is zunde dat-tie ouwe kapper van je d'r mee is 'estopt. Waer je non 'eweest ben, dà's niks 'oor.
Wie 'êt je zô toe'etaekeld?"
"Jae bij die nieuwe zaek. Toe'-'k-t'r binne'kwam, stapte d'r 'n man op me-of en die zee teuge me:"Voor U geknipt wor', zelle we êrst Uw 'aer wasse."
"Dat 'eb-'k vanmurrege onder de douche zellef al 'edaen", zee-'k.
"Dà'-ken wel weze, mar alles wordt 'ier êrst 'ewasse en dan pas 'eknipt."
Ik wier deur 'n vrouwspersôn onder 'ande 'enome en toe vorders deur 'n man, die zee teuge me:" We zelle d'r êrst wat fesoen in gaen brenge."
Ik zag ammaar vlokke dwarrele.
"Blêf-t'r nog wat opzitte?", vroog-'k.
"Mêr as genog", zee die.
Toe'-ben-'k mar wat gaen zitte klesse met-'m, ik wier met 'n föhn bewerrekt en toe'-moch'-'k flink wat euro's achterlaete en was-'k weer vrij."
"Weet je wà'-je mot gaen doen, man, weer 'n ouwerwesse barbier op gaen zooke, die 'aershops, die benne niks voor jou, al dat mederne gedoe.
As 't iet lukt d'r ien te vinne, dan gaen ik voor de twiede kêr in me leve 'n knipcursus vollege; non iet om kleding zellef te maeke, mar om jou netjies bij te knippe."
" Dà'-ken iet, Im."
"Daer gaen-'k tan toch voor lêre."
"Je ken d'r nôit bij-knippe, wel 'ier en daer wat-t'r of.
Mar laen-'k êrst mar kikke of t'r ier vorderop, urreges in de buurt 'n barbier zit."
Ik 'oop van 'arte dat-tie van mên d'r nog ien ken vinne, want voor kapster ben ik iet zô 'eknipt.....

Nadruk verboden Immetje